jueves, 27 de noviembre de 2014

De conventu hesterno

Heri iucundissimam sessionem Circuli Norbae celebravimus, in qua argumenta maxime diversa, a Rolling Stones usque ad Parvum Nicolaum per familiam Pacual Duarte, nobis ad latine loquendum occasionem praebuerunt.

Ioachimus sodalis noster nobis lepidissimum textum proposuit ubi cum historiam gregis musicalis Rolling Stones (Voluta Saxa, si dicere licet) tum versionem carminis Jumpin' Jack Flash (Saltator Iacobus Flaccus) tractavit.

Postea Marius, Cauriensis amicus, legit et rimatus est nonnullas lineas e libro De familia Pascual Duarte, in linguam latinam verso a Barbara Pastor de Arozena. Lectione facta, omnes in eandem sententiam venimus: difficilius esse hunc librum legere quam ipsum Tullium.

Postremo, ut mos iam est in sessionibus nostris, diurnarius Iosephus Maria Alegre orationem habuit ut facete lepide iocose nuntium de Parvo Nicolao nobis referret. Tam mirificis verbis hominem pinxit, ut ipse Nicolaus ille Parvus in conventu inexspectatus apparuit, de cuius adventu haec photographia testis est.


Dicimus etiam diem ad proximum conventum, qui, dis faventibus, habebitur Emeritae die XXI mensis Ianuarii. Tunc partes primas agent Isabella Yende, Maria Ludovica Harto et Iacobus Campo. Ut semper, omnes optatissimi advenietis.

domingo, 16 de noviembre de 2014

Circulus Lusitanus in Symposio Extrematurensi Studiorum Classicorum

Circuli nostri commendationem in Symposio Extrematurensi Studiorum Classicorum iam egimus.

Difficillimum fuit nobis tironibus latine coram loqui postquam facundissimam et disertissimam orationem Georgi Tarrega audivimus.  Georgius perspicue et planissime de tradendis methodo viva disciplinis non solum in lyceis sed etiam in universitate locutus est.


Postquam Georgius finem fecit, liberum nobis fuit exhibitionem Circuli agere. Hic vos monstramus quod, plus minusve, diximus.




Abhinc incipit Iosephus Maria Alegre, qui de nuntiis hodiernis disputat:

jueves, 2 de octubre de 2014

Sessiones renovamus

Novo cursu ineunte, Circulus noster sessiones novis viribus incipere vult.

Hodie vesperi Emeritam convenimus et disputavimus qua ratione proximae sessiones Circuli ducendae essent. Tandem decrevimus ut in quoque conventu eundem textum, quem quidam nostrum praebuerit, omnes legeremus.

Ut diximus in postremo coetu ante ferias aestivas, Iosephus Maria Alacer, diurnarius Circuli, operam ad res novas latine modulandas dabit.

Diximus diem ad proximum coetum, qui, diis iuvantibus, habebitur Norbae die XXX mensis Octobris. Tunc de exhibitione Circuli nostri, in Symposio Studiorum Classicorum habitura, loquemur. 

Omnes amicos sodalesque Norbae exspectabimus.

viernes, 6 de junio de 2014

De quarto conventu

Die Mercurii praeterito nonnulli sodales Castra Caecilia convenimus ut sessionem quartam Circuli nostri ageremus. Haec sessio fuit postremus coetus ante ferias aestivas.

Legimus primum epistulam Joannis Ludovicis Vivis, anno 1523 scriptam, De ratione studii puerilis nuncupatam, in qua ille secundus Quintilianus explanat quo consilio discipulus ante magistrum se gerere debeat. Postea, mansimus apud Vivem et legimus aliquos versus De tradendis disciplinis, qui de nonnullis exercitationibus scholasticis versantur, e quibus haud paucae a paedagogis hodierno tempore maximi momenti iudicantur.

Deinde ad Phaedrum venimus et rimamur fabulam de rana rupta et bove, non solum per textum  Phaedri sed etiam per hanc aptationem, utillimam ad scholam, quam invenire possumus loco interretiali Langues et Cultures de l' Antiquité.

Postremo, postquam nuntium lepidissimum a Iosepho Maria Alacre nostro scriptum audivimus, de abdicatione regis Hispanorum loquimur.

Et non finem conventus fecimus antequam decrevimus quid nobis proximo cursu academico faciendum esset. Haec sunt consilia:
  • Nos denuo convenire mense Septembri.
  • Omnes nos legere unum atque eundem textum in singulis sessionibus, ut colloquia facilius fluant.
  • Iosephum Mariam Alacrem, quippe qui mirabilem venustatem in nuntiis scribendis monstraverit, diurnarium Circuli nostri creare, ut nobis nuntia de rebus novis quoque coetu tradat.
  • Aestate pergere actionem nostram in rete: apud twitter, facebook, google +.
Optime valeatis, amici et sodales. Omnes vos rursus exspectamus novis viribus praediti ad initium cursus.


jueves, 29 de mayo de 2014

Invitatio ad quartam sessionem

Dilecti sodales:

Ut iam diximus, sessio quarta Circuli Latini Lusitani Castris Caeciliis die quarto mensis Iunii habebitur. Conveniemus circa 17'30 h. apud Facultatem Philosophiae et Litterarum.

Si vobis licebit et placebit, copia colloquendi latine de quavis re erit. Nonnulla scripta, quae superiore sessione legere nequivimus, nunc legemus.

Vos omnes, qui linguam latinam amatis, exspectamus.

miércoles, 30 de abril de 2014

Sessio tertia Circuli nostri

Heri vesperi Emeritae fuimus nonnulli collegae ad tertiam sessionem Circuli nostri agendam.

Spatium duarum horarum sermone latino fruimur. Tempus fuit ut de variis rebus loqueremur: de quadam notissima pelicula Nox quaedam fabulae modulatae dicata nuncupata, a fratribus Marx acta; de nonnullis libris valde bonis ad linguam latinam discendam, scilicet Fabulae faciles, Assimil in lingua latina, vel Piper Salve; de pulcherrimo itinere archaeologico ad Carranque ut villam magnificam Materni videamus; de ritu canonizationis Ioannis XXIII et Ioannis Pauli II, qui nuperrime in numero sanctorum Ecclesiae Catholicae inscripti sunt; et postremo de epistula quam Tullius ad Atticum scripsit, in qua de petitione consulatus una cum Catilina narrabat.

Tandem statuimus nos quartam sessionem Circuli die quarto mensis Iunii acturos, Castris Caeciliis apud Facultatem Philosophiae et Litterarum, ad quam optatissimi omnes advenietis.


domingo, 27 de abril de 2014

De proxima sessione Emeritae habenda

Salvete, amici et collegae.

Vobis nuntiamus proximam sessionem Circuli Latini Lusitani apud Centro de Profesores Emeritense habituram, die XXIX mensis Aprilis, Martis die, ad horam 17'30.

Magnopere gaudemus quod Circulus noster crescere videtur. In hoc conventu speramus ut nonnulli professores discipulique Philologia Classicae Universitatis Extrematurensis conveniant.

Omnes vos hortamur ut, si facultas eundi etiam minima vobis sit, Circulum adeatis, vel ad audiendum tantum.

Quam optime valeatis.


jueves, 3 de abril de 2014

Sessio secunda Castris Caeciliis habita

Heri nōnnūllī latīnē loquentēs, cuius numerus in diēs crescit, convēnīmus in Facultāte Philosophiae et Litterārum. Ibi locūtī sumus de variīs rēbus venustē et iucundē. Fuit quī dē carminibus quae "blues" nōminantur ōrātiōnem fecerit; item quī magnificam laudātiōnem fūnebrem Turiae lēgerit; etiam quī fābulam "Habēmus Mammam" nuncupātam egerit; postrēmō quī de quōdam carmine hodiernō, quod grex "Burning" modulātus est, facētiam scholasticam nārrāverit.

Gaudēmus quod nōnnūllī professōrēs et discipulī litterārum classicārum conventuī nostrō interfuerunt: Circulus Latīnus Lūsitānus crescere vidētur.

Tandem dēcrēvimus conventum proximum Emeritae habitūrum, diē XXIX mēnsis Aprīlis. Omnēs vōs, quī linguam latīnam amātis et latīnē garrīre nōn timētis, exspectāmus.





martes, 25 de marzo de 2014

De sessione mensis Aprilis


Salvete amici et sodales.

Proximus conventus Circuli nostri habebitur die secundo mensis Aprilis, circa horam 17'30 h., apud Facultatem Philosophiae et Litterarum, Castris Caeciliis sitam.
Sicut fecimus in primo conventu, in hac sessione quisque nostrum textum latinum leget et latine explanabit.
Si vobis placet, ad horam 17'30 conveniemus ante portam principalem facultatis. Deinde ad quandam aulam ibimus, quam amabilissime profestrix Mª Luisa Harto nobis parabit.

P.S.: Non repugnabitur si quisque nostrum, una cum textu latino, afferet cafeam, theam, dulces vel alias huiusce modi cuppedias.

martes, 4 de marzo de 2014

De conventu Emeritae habito

Die vicesimo septimo mensis Februarii sessio prima Circuli Latini Lusitani Emeritae se habuit.
Septem collegae illuc convenimus atque de variis rebus locuti sumus: de correctione rusticorum, secundum salsum textum Martini Bracarensis; de Seneca minore, cive totius mundi; de duobus libris quos aliquando in schola legere possumus, Petrus Hirsutus et Telling Tales in Latin; de Catulli erga Lesbiam amore; etiam de morte inopinata magistri cytharae nomine Paco de Lucía.

Tandem die vicesimo sexto mensis Martii Castris Caeciliis rursus convenire statuimus, ut legamus et latine loquamur eodem consilio: quemque nostrum textum latinum, qui sibi placeat, lecturum.

martes, 25 de febrero de 2014

De proximo coetu Circuli nostri


Sessio habebitur die XXVII mensis Februarii, Iovis die, circa horam 17:30, apud Centro de Profesores Emeritae. In hac sessione consilium cepimus quemque nostrum textum latinum, antiquum vel hodiernum, qui sibi placeat, lecturum esse. Nobis profecto rectius visum est nullum textum certum in hac prima sessione Circuli imponere, sed, adhibita libertate, sinere quemque de qua re libet latine loqui.

Si vobis licet et placet, illuc conveniemus.

viernes, 24 de enero de 2014

Circulus Latinus Lusitanus iamiam progreditur!

Heri a.d. IX Kal. Februarias institutus est Circulus Latinus Lusitanus in contione Emeritae habita.
Ecce magistri Latinitatis qui ad hunc primum conventum adierunt.


Conventus in posterum mense habebuntur, in Castris Caeciliis et Emeritae invicem.

Ecce quod agere volumus:
  1. Lectiones textuum Latinorum: Unus vel duo nostrum lectionem facit cuiusdam textus qui ei(s) placeat. Lectio cum interpretatione agetur; postea colloquium de textu habebitur inter omnes.
  2. Quidquid in schola agimus: Aliquis e magistris Circuli ceteris narrat quandam experientiam quae in schola cum discipulis facta esset.
  3. Fabulas agimus: Nonnulli nostrum brevem et salsam fabulam agunt.
  4. Commentarii de rebus novis, quae in diurnariis aut in televisione aut in interreti videntur.